நிலவின் தென் பகுதியை ஆய்வு செய்யச் சந்திரயான் 2 விண்கலத்தை இஸ்ரோ, கடந்த ஜூலை 22ஆம் தேதி அனுப்பி வைத்தது. சந்திரயான் 2 விண்கலத்தில் விக்ரம் லேண்டர், ஆர்பிட்டர், ரோவர் உள்ளிட்டவை ஆராய்ச்சிக்காக அனுப்பி வைக்கப்பட்டது.
இஸ்ரோ திட்டமிட்டிருந்தபடி, சந்திரயான் 2 விண்கலத்திலிருந்து ஆர்பிட்டர் நிலவை சுற்றிவரத் தொடங்கியது. தொடர்ந்து விக்ரம் லேண்டரும் நிலவில் தரையிறங்கத் தனது பயணத்தை தொடங்கியது. அதன்படி, செப். 7ஆம் தேதி தரையிறங்கும் என எதிர்பார்க்கப்பட்ட நிலையில் விக்ரம் லேண்டருடனான தொடர்பு கிடைக்காமல் போனது.
பின் லேண்டர் குறித்த எந்த தகவலும் இஸ்ரோவுக்கு கிடைக்கவில்லை. பல்வேறு முயற்சிகளுக்குப்பின், விக்ரம் லேண்டரை கண்டுபிடிக்க முடியவில்லை என இஸ்ரோ அறிவித்தது. அதன்பின் இஸ்ரோ, நாசாவுடன் இணைந்து விக்ரம் லேண்டரை தேடத் தொடங்கியது.
இந்நிலையில், விக்ரம் லேண்டர் கீழே விழுந்த இடத்திலிருந்து வட மேற்கு திசையில் 750 மீட்டர் தொலை வரை சிதரல்கள் கண்டுபிடிக்கப்பட்டுள்ளது. இதைச் சுப்பிரமணியன் என்பவர் கண்டுபிடித்துள்ளார் என தெரிவிக்கப்பட்டுள்ளது
